Mon10162017

Last updateTue, 24 May 2016 11am

Back You are here: Home የምርጫ ዜናዎች በብሄራዊ ቴሌቪዥን የተሰራጨው የፓርቲዎች ክርክር በተመልካች እይታ

በብሄራዊ ቴሌቪዥን የተሰራጨው የፓርቲዎች ክርክር በተመልካች እይታ

 

በመጪው ብሄራዊ ምርጫ ተወዳዳሪ የሆኑ ፓርቲዎች በመንግስት በሚተዳደረው የኢትዮጵያ ብሮድካስቲንግ ኮርፖሬሽን (ኢቢሲ) ሁለት የተለያዩ የምርጫ ክርክሮችን አካሂደዋል፡፡ በብቸኛው የሃገሪቱ ብሄራዊ ቴሌቪዥን በተሰራጩት ሁለቱም የፖለቲካ ፓረቲዎች የምርጫ ክርክሮች ገዢው ፓርቲ የኢትዮጵያ ህዝቦች አብዮታዊ ዴሞክራሲያዊ ግንባር (ኢህአዴግ) ከሌሎች ተከራካሪ ፓርቲዎች በበለጠ እና በተለየ ሁኔታ ከፍተኛውን የአየር ሰዓት በመውሰድ ላዕላይነቱን ለማሳየት ሞክሯል፡፡

የመጀመሪያው ክርክር የተካሄድው መጋቢት 4 እና 5 ቀናት 2007 ዓ.ም.  ከምሽቱ 2 ሰዓት የዜና እወጃ በኋላ በሁለት ክፍሎች ተከፍሎ ሲሆን የወቅቱ የመከራከሪያ ርዕስም “የብዝሃን ፓርቲ ስርዓት እና የሰበዓዊ እና የዴሞክራሲያዊ መብቶች በኢትዮጵያ” የሚል ነው፡፡ ኢህአዴግ፣ ሰማያዊ ፓርቲ፣ የአራት ፓርቲዎች ጥምረት የሆነው መድረክ፣ አንድነት ለዴሞክራሲ እና ለፍትህ (አንድነት) እንዲሁም የአዲሱ ትውልድ ፓርቲ ተሳታፊ ሆነዋል፡፡

ለክርክሩ በአጠቃላይ ከተመደበው 120 ደቂቃ ውስጥ 45 ደቂቃዎችን ኢህአዴግ በጉዳዩ ላይ ሃሳቡን ለመግለጽ የወሰደ ሲሆን ቀሪዎቹን 75 ደቂቃዎች አራቱ ፓርቲዎች ተከፋፍለውታል፤ ይህም ለእያንድ አንዱ ፓርቲ 18 ደቂቃዎች ነው የደረሳቸው፡፡ በክርክሩ የማስተዋወቂያ ምዕራፍ ላይ የኢህአዴግ ተወካዮች ፓርቲያቸውን ለማስተዋወቅ እና በመከራከሪያ ርዕሰ ጉዳዩ ላይ ያላቸውን አቋም ለመግለጽ 15 ደቂቃዎች የተሰጣቸው ሲሆን ሌሎቹ አራት ፓርቲዎች ለእያንድአንዳቸው ስድስት ስድስት ደቂቃዎች ተሰጥቷቸዋል፡፡ በሁለተኛው የመወያያ ምዕራፍ  አራቱ የተቃዋሚ ፓርቲዎች እያንድአንዳቸው ዘጠኝ ዘጠኝ ደቂቃዎች የደረሳቸው ሲሆን ገዢው ፓርቲ 20 ደቂቃዎች ተመድቦለታል፡፡ ገዢው ፓርቲ በሶስተኛው የማጠቃሊያ ምዕራፍ 10 ደቂቃዎች የተመደበለት ሲሆን ሌሎቹ ፓርቲዎች እያንዳንዳቸው አራት አራት ደቂቃዎች ነው የተሰጣቸው፡፡

በሁለቱም የክርክር መድረኮች በተከራካሪ ፓርቲዎች መካከል እኩል ያልሆነ የሰዓት ክፍፍል ከመመደቡ በተጨማሪ ኢህአዴግ በሁለት ዋና አቅራቢዎች የተወከለ ሲሆን ሌሎቹ ፓርቲዎች እያንድአንዳቸው አንድ አንድ ዋና ተከራካሪ ነው ያቀረቡት፡፡

መጋቢት 11 እና 12 ቀናት 2007 ዓ.ም. በብሄራዊ ቴሌቪዥን የተላለፈው ሁለተኛው ክርክር የመወያያ አጀንዳ የፍድራሊዝም ጉዳዮች ላይ መሰረት ያደረገ ነው፡፡ በዚህ የክርክር መድረክ ኢህአዴግ፣አንድነት፣ የመላው ኢትዮጵያ አንድነት ድርጅት (መኢአድ) እና የመላው ኢትዮጵያ ብሄራዊ ንቅናቄ (መኢብን) ተሳታፊ የሆኑ ሲሆን ሰማያዊ ፓርቲ፣ መድረክ እና የአዲሱ ትውልድ ፓርቲ አልተሳተፉም፡፡ ኢሀአዴግ እና አንድነት ፓርቲ በሁለተኛው የክርክር መድረክ ቀርበው ሃሳባቸውን እንዲያስረዱ ሲደረግ በመጀመሪያው የክርክር መድረክ ቀርበው የነበሩት ሶስቱ ፓርቲዎች በሁለተኛው ክርክር ላይ እንዳይቀርቡ የተደረገበት ምክንያት ግልጽ አይደለም፡፡

የኢትዮጵያ ብሮድካስቲንግ ኮርፖሬሽን በመጪዎቹ ቀናት ሰባት ተጨማሪ የፓርቲዎች ክርክር እንደሚያደርግ እና በእነዚህም ክርክሮች “ለምርጫው እንደአቀረቡት እጩ ተወዳዳሪ ብዛት መጠን” 12 ፓርቲዎች እንደሚሳተፉ ይጠበቃል፡፡ ያለፉትን ሁለት ክርክሮች ጨምሮ የመገናኛ ብዙሃን ተቋሙ ለክርክሮቹ 18 ሰዓት የመደበ ሲሆን እያንድአንዱ ክርክር 120 ደቂቃዎች ይፈጃል፤ ሰባት የተለያዩ የመከራከሪያ አጀንዳዎችም ተቀምጠዋል፡፡